బాబుతో బాలకృష్ణ గుసగుసలు

హైదరాబాద్‌: నందమూరి బాలకృష్ణ ఆదివారం టీడీపీ అధ్యక్షుడు చంద్రబాబుతో సమావేశమయ్యారు. ఆదివారం చంద్రబాబు నివాసానికి వచ్చిన బాలయ్య కొద్దిసేపు రాజకీయాల గురించి, తన పర్యటన గురించి మాట్లాడారు. ఆ తర్వాత వియ్యంకులిద్దరూ కలసి మరో సినీ ప్రముఖుడు మోహన్‌ బాబు కుమారుడి వివాహానికి వెళ్ళారు. ఆ తర్వాత బాలయ్య మధ్యాహ్నం సమయంలో తన సన్నిహితులు, వాలంటీర్లకు విందు ఇచ్చారు. రాయలసీమలో చేపట్టిన తొలి విడత టూర్‌లో బాలకృష్ణ వెంట ఉన్న వాలంటీర్లు ఈ విందులో పాల్గొన్నారు.

ఈ నెల 8 నుంచి నెల్లూరు, ప్రకాశం జిల్లాల్లో తలపెట్టిన పర్యటనపై చర్చ జరిగింది. తొలి విడత పర్యటనలో దొర్లిన లోపాలు పునరావృతం కాకుండా చూడాలని బాలయ్య అందరికీ సూచించారు. ఈలోగా ఎన్నికల నిబంధనావళి అమల్లోకి రానున్న నేపథ్యంలో తన పర్యటన సమయంలో పార్టీ నాయకులు నిబంధనలను పక్కాగా అనుసరించి ఏర్పాట్లు చేయాలని బాలయ్య సూ చించారు.

అయితే బాలకృష్ణ పర్యటన వాయిదా పడే అవకాశం ఉన్నట్టు పార్టీ వర్గాలు తెలిపాయి. మహాకూటమి ఈ నెల 9న హైదరాబాద్‌ పరిసరాల్లో 'మహా'గర్జన నిర్వహించాలని నిర్ణయించిన నేపథ్యంలో..బాలయ్య పర్యటన వాయిదా వేయాలన్న సూచన వచ్చింది. గర్జన ఏ ర్పాట్లలో పార్టీ యంత్రాంగం తలమునకలై ఉండే పరిస్థితుల్లో బాలయ్య పర్యటన ఏర్పాట్లు కష్టమవుతాయని నేతలు పేర్కొన్నారు.