విజయశాంతికి రెండు'పాత్రలు'

హైదరాబాద్‌: తన తల్లి తెలంగాణ పార్టీని టీఆర్‌ఎస్‌లో విలీనం చేసిన సినీనటి విజయశాంతిని టీఆర్‌ఎస్‌లో జంట పదవులు వరించాయి. ఆమెకు పార్టీ సెక్రటరీ జనరల్‌ హోదాతోపాటు, పార్టీ రాజకీయ వ్యవహారాల కమిటీ చైర్‌పర్సన్‌ బాధ్యతలూ అప్పగించారు. సెక్రటరీ జనరల్‌..ఇప్పటివరకు పార్టీలో లేని కొత్త పదవి. ఈ విషయాన్ని కేసీఆర్‌ ఆదివారం ప్రకటించారు.

ఈ పదవులు విజయశాంతికి తక్కువేనని..ఆమె తన పదో చెల్లెలని కేసీఆర్‌ పునరుద్ఘాటించారు. తెలంగాణ వ్యాప్తంగా విజయశాంతి సుడిగాలి పర్యటనలు చేస్తారన్నారు. విలీనం తర్వాత ఆమె పార్టీ కార్యాలయానికి రావడం ఇదే ప్రథమం. అప్పటికే పార్టీ కార్యాలయంలో ఉన్న కేసీఆర్‌ను ఆమె కలుసుకున్నారు. అనంతరం కేసీఆర్‌, పార్టీ సిద్ధాంతకర్త జయశంకర్‌ వెంటరాగా తెలంగాణ భవన్‌ ఆవరణలోని తెలంగాణతల్లి విగ్రహానికి పూలమాల వేశారు. తర్వాత విజయశాంతికి ప్రత్యేకంగా కేటాయించిన చాంబర్‌కు కేసీఆర్‌ ఆమెను తీసుకు వెళ్లి నూతన బాధ్యతలను అప్పగించారు.