తెలంగాణ నుంచి కూడా పోటీ: చిరు

ఆదిలాబాద్: రాష్ట్రంలో రెండు చోట్ల నుంచి పోటీ చేసే ఆలోచన ఉందని ప్రజారాజ్యం అధినేత చిరంజీవి శనివారం ప్రకటించారు. తిరుపతి నుంచి పోటీ చేస్తానని ఆయన ఇప్పటికే ప్రకటించారు. రేండో స్ధానం తెలంగాణలో ఉంటుందని ఆయన సూచన ప్రాయంగా తెలియజేశారు. ప్రజా అంకిత యాత్రలో భాగంగా అయన ఆదిలాబాద్ జిల్లాలో శనివారం కూడా పర్యటిస్తున్నారు.

తెలంగాణపై తమకు స్పష్టత లేదని కొందరు విమర్శిస్తున్నారని, ఏ పదాలు ఉపయోగిస్తే స్పష్టత ఉంటుందో చెబితే తమ మేనిఫెస్టోలో ఆ పదాలు ఉపయోగిస్తామని ఆయన శనివారం ఉదయం మీడియా సమావేశంలో అన్నారు. ఉమ్మడిగుర్తు రానందున జాతీయపార్టీ అయిన ఎన్సీపీ గుర్తుపై ప్రజారాజ్యం పోటీచేస్తుందని వస్తున్న వార్తలను ప్రజారాజ్యం అధ్యక్షుడు చిరంజీవి ఖండించారు. ఉమ్మడిగుర్తు రాకపోతే ఏ పార్టీ గుర్తు అయినా తీసుకుని పోటీచేయాలని తాము భావించి సంప్రదింపులు జరిపిన మాట వాస్తవమేనని ఆయన అన్నారు. ఎన్సీపీ మరికొన్ని పార్టీలు అందుకు అంగీకరించాయని అయితే దానివల్ల వచ్చే సాధకబాధకాలను కూడా పరిశీలించామని అన్నారు. ఎన్సీపీతో కలిసి తాము పోటీచేసే ప్రసక్తే లేదని ఆయన స్పష్టం చేశారు. తమ అభ్యర్థుల తొలి జాబితాను ఈనెల 10న విడుదల చేస్తామని ఆయన తెలిపారు.