ప్రత్యామ్నాయం ఉంది: అల్లు అరవింద్

న్యూఢిల్లీ: ఉమ్మడి గుర్తు విషయంలో తమకు ప్రత్యామ్నాయం ఉందని ప్రజారాజ్యం పార్టీ నాయకుడు, చిరంజీవి బావ మరిది అల్లు అరవింద్ చెప్పారు. తమ పార్టీకి ఒకే గుర్తు కేటాయించేలా ఎన్నికల కమిషనుకు ఆదేశాలివ్వాలని కోరుతూ ఆయన శుక్రవారం సుప్రీంకోర్టులో పిటిషన్ దాఖలు చేశారు. తమకు ఉమ్మడి గుర్తు వస్తుందని నమ్మకం ఉందని, ఒక వేళ రాకపోతే ప్రత్యామ్నాయం కూడా ఉందని ఆయన మీడియా ప్రతినిధులతో చెప్పారు. ఉమ్మడి గుర్తు కోసం సుప్రీంకోర్టులో పిటిషన్ వేసేందుకు ఆయన గురువారం ఢిల్లీ వచ్చారు.

ఉమ్మడి గుర్తు కేటాయించలేమని ఎన్నికల కమిషన్ తేల్చి చెప్పడంతో ప్రజారాజ్యం పార్టీ కష్టాల్లో పడింది. ఉమ్మడి గుర్తు సాధన కోసం సర్వశక్తులూ ఒడ్డుతోంది. కోర్టు ద్వారా దాన్ని సాధించుకునేందుకు ప్రయత్నాలు చేస్తోంది. ఒక వేళ ఆ మార్గంలో కూడా సాధ్యం కాకపోతే సిక్కిం వంటి కొన్నిరాష్ట్రాల్లో ఉన్న చిన్న పార్టీ గుర్తుపై పోటీ చేసేందుకు కూడా రంగం సిద్ధం చేసుకుంటోంది.