చిరుపై పోటీ: జీవిత దాటవేత

హైదరాబాద్: పార్టీ అదేశిస్తే తాను ఎవరి మీదనైనా పోటీ చేస్తానని కాంగ్రెసు నాయకురాలు, సినీనటి జీవిత అన్నారు. ప్రత్యేకంగా ఒక నటుడిపైనో, నటిపైనో పోటీ చేయాలని తాను అనుకోవడం లేదని ఆమె శుక్రవారం మీడియా ప్రతినిధులతో అన్నారు. చిరంజీవిపైన గానీ, రోజాపైన గానీ పోటీ చేస్తారా అని అడిగిన ప్రశ్నకు ఆమె నేరుగా సమాధానం ఇవ్వలేదు. పార్టీ ఆదేశిస్తే ఎవరి మీదనైనా పోటీ చేస్తానని, పోటీ చేయడమే కాదు గెలిచి తీరుతానని ఆమె అన్నారు. తాను పోటీ చేయాలా, వద్దా పార్టీ అధిష్టానం నిర్ణయిస్తుందని ఆమె అన్నారు. ఎక్కడి నుంచి పోటీ చేసినా గెలిచి తీరుతానని ఆమె ధీమా వ్యక్తం చేశారు.

పార్టీ పోటీ చేయవద్దు, ప్రచారానికి మాత్రమే పరిమితం కావాలని ఆదేశిస్తే అందుకు కూడా తాను సిద్ధమేనని ఆమె అన్నారు. తనకు ఎవరూ పోటీ అనుకోవడం లేదని ఆమె అన్నారు. తాను నిజాలు మాత్రమే చెప్తానని, నిజాలేమిటో ప్రజలకు తెలుసునని ఆమె అన్నారు. రాష్ట్ర ప్రజలకు కాంగ్రెసు మాత్రమే మేలు చేయగలదని చెప్పి తాను ప్రజలను ఒప్పించగలనని ఆమె అన్నారు.