కుటుంబమంతా ఒక్కటే: ఎన్టీఆర్

విశాఖపట్నం: వ్యక్తిగత విమర్శల జోలికి పోనని, తన గురించి ఎవరైనా తప్పుగా మాట్లాడినా పట్టించుకోనని స్పష్టం చేశారు. తమ కుటుంబంలో ఎటువంటి భేదాభిప్రాయాలు లేవని, అంతా కలిసే ఉన్నామని చెప్పారు. దగ్గుబాటి దంపతులంటే తనకు చాలా గౌరవమని, వారు తనను ఆప్యాయంగానే చూసుకుంటారని తెలిపారు. గురువారం ఆయన ఒక ప్రముఖ తెలుగు దిన పత్రికకు ఇంటర్వ్యూ ఇచ్చారు. బడుగు, బలహీన వర్గాల ఉన్నతి కోసం తెదేపా ఆవిర్భవించిందని, కాంగ్రెస్‌ పాలనలో వారు ఎన్నో ఇబ్బందులు ఎదుర్కొంటున్నారని తెలిపారు. పేదల సమస్యలను తెలుసుకోవడం, వాటిపై స్పందించడం, తెదేపా అధికారంలోకి వస్తే సమస్యలు పరిష్కరించడం వంటి అంశాలే లక్ష్యంగా తన ప్రచారం సాగుతుందని చెప్పారు.

తన పర్యటన సందర్భంగా స్థానికంగా ప్రజలు ఎదుర్కొంటున్న అనేక ఇబ్బందులు తన దృష్టికి వచ్చాయన్నారు. ఈ వివరాలను పార్టీ అధ్యక్షుడు చంద్రబాబు దృష్టికి తీసుకెళ్లానన్నారు. ఈ అంశాలపై ఒక నివేదిక ఇవ్వాలని సూచించారని, అధికారంలోకి వస్తే సమస్యలు పరిష్కరించేందుకు చర్యలు తీసుకుంటామని బాబు వెల్లడించారని ఎన్టీఆర్‌ చెప్పారు. శ్రీకాకుళం, విజయనగరం జిల్లాల్లోని కొన్ని మారుమూల గ్రామాల్లో ఇప్పటికీ విద్యుత్తు సరఫరా లేదని ఆవేదన వెలిబుచ్చారు. తాత(ఎన్టీఆర్‌) స్థాపించిన తెదేపాను మళ్లీ అధికారంలో తీసుకొచ్చి రాష్ట్ర ప్రజలు ఎదుర్కొంటున్న సమస్యలను పరిష్కరించడమే ప్రస్తుతం తన ముందున్న లక్ష్యమని తెలిపారు.