వైయస్ జగన్ కు చేదు అనుభవం

కడప: ముఖ్యమంత్రి డాక్టర్ వైయస్ రాజశేఖర రెడ్డి కుమారుడు వైయస్ జగన్మోహన్ రెడ్డికి కడప మేయర్ రవీంద్రనాథ్ రెడ్డి నుంచి వ్యతిరేకత ఎదురవుతోంది. కడప శాసనసభ సభ సీటును ఆశించిన వైయస్ రాజశేఖర రెడ్డి బావ మరిది రవీంద్రనాథ్ రెడ్డికి నిరాశ ఎదురైంది. దాంతో ఆయన తీవ్ర అసంతొప్తితో ఉన్నారు. కడప లోకసభ సీటుకు పోటీ చేస్తున్న వైయస్ జగన్మోహన్ రెడ్డి గురువారంనాడు దాని ఫలితాన్ని చవి చూశారు.

కడపలో జగన్ ప్రెస్ మీట్ వద్ద రవీంద్రనాథ్ రెడ్డి అనుచరులు ఆందోళనకు దిగారు. రవీంద్రనాథ్ రెడ్డికి టిక్కెట్ ఇవ్వాలని నినాదాలు చేశారు. దీంతో జగన్ ప్రెస్ మీట్ లో రభస చోటు చేసుకుంది. దానికి అలిగిన జగన్ తాను పోటీ నుంచి విరమించుకుంటానని అన్నారు. మొత్తం మీద జగన్ కు రవీంద్రనాథ్ రెడ్డి నుంచి వ్యతిరేకత తప్పేట్లు లేదు.రవీంద్రనాథ్ రెడ్డిని జగన్ కలిశారు. టిక్కెట్ ఇవ్వనందుకు రవీంద్రనాథ్ రెడ్డి సీరియస్ గా ఉన్నట్లు పరిణామాలు తెలియజేస్తున్నాయి.