బాబు రథచక్రాల కింద మనిషి

నల్లగొండ: తెలుగుదేశం పార్టీ అధ్యక్షుడు నారా చంద్రబాబు నాయుడు నల్లగొండ జిల్లా పర్యటనలో అపశృతి దొర్లింది. నల్లగొండ జిల్లా హుజూర్ నగర్ లో ఆదివారం రాత్రి చంద్రబాబు చైతన్య రథం చక్రం కింద ఒక వ్యక్తి పడ్డాడు. సైదులు అనే వ్యక్తి కాలు చైతన్య రథం చక్రం కింద చిక్కుకుపోయింది. వాహనాన్ని వదిలేసి చంద్రబాబు కోదాడ బయలుదేరి వెళ్లారు. తెలుగుదేశం పార్టీ కార్యకర్తల సహకారంతో పోలీసులు గంట పాటు కష్టపడి సైదులును సురక్షితంగా వెలికి తీయగలిగారు. సైదులుకు ఆస్పత్రిలో చికిత్స జరుగుతోంది.

నల్లగొండ జిల్లా పర్యటనలో చంద్రబాబు కాంగ్రెసు పాలనపై ధ్వజమెత్తారు. కాంగ్రెసు ప్రభుత్వం అవినీతిలో కూరుకుపోయిందని ఆయన విమర్శించారు. తాము తెలంగాణపై ఇచ్చిన మాటకు కట్టుబడి ఉంటామని ఆయన చెప్పారు. కాంగ్రెసు తెలంగాణ ప్రజలను మోసం చేసిందని ఆయన దుయ్యబట్టారు. చంద్రబాబు పర్యటనకు విశేష స్పందన లభించింది.