చిదంబరంపై బూటు విసిరిన జర్నలిస్టు

న్యూఢిల్లీ: కేంద్ర హోంమంత్రి చిదంబరంపై ఒక సిక్కు విలేకరి బూటు విసిరాడు. శాంతిభద్రతల పరిస్థితి, అస్సాంలో పరిణామాలు, కసబ్‌ విచారణ తదితర అనేక అంశాలపై హోంమంత్రి చిదంబరం మంగళవారం విలేకరుల సమావేశం నిర్వహించారు. ఈ సందర్భంగా జర్నెయిల్‌ సింగ్‌ అనే విలేకరి ఇందిరాగాంధీ హత్య సందర్భంగా ఢిల్లీలో జరిగిన సిక్కు వ్యతిరేక అల్లర్లలో నిందితుడైన జగదీశ్‌ టైట్లర్‌కు క్లీన్‌ చిట్‌ ఇవ్వటాన్ని గురించి ప్రశ్నించారు.

దీన్ని గురించి చిదంబరం మాట్లాడుతుండగా జర్నెయిల్‌ సింగ్‌ ఆయనపై బూటు విసిరాడు. దీంతో ఒక్కసారిగా అక్కడ ఉద్రిక్తత నెలకొంది. భద్రతాసిబ్బంది వెంటనే అతన్ని అదుపులోకి తీసుకుని స్థానిక పోలీసులకు అప్పగించారు. అతన్ని తాను క్షమించానని, అతని మనోభావాలు దెబ్బతిన్నందునే అలా ప్రవర్తించాడని అనంతరం చిదంబరం అన్నారు. గతంలో ఒక విలేకరి అప్పటి అమెరికా అధ్యక్షుడు జార్జి బుష్ మీద బూట్లు విసిరిన సంగతి తెలిసిందే.