మేం గెలిస్తే ప్రజలు గెలుస్తారు: జెపి

హైదరాబాద్: తమ పార్టీని గెలిపిస్తే ప్రజలు గెలుస్తారని లోక్ సత్తా వ్యవస్థాపక అధ్యక్షుడు జయప్రకాష్ నారాయణ అన్నారు. తాను అధికారం కోసం రాజకీయాల్లోకి రాలేదని, రాజకీయాలను మార్చడానికి వచ్చానని ఆయన గురువారం మీట్ ది ప్రెస్ కార్యక్రమంలో అన్నారు. రాజకీయాల ద్వారా సామాన్యుల కలలు సాకారం కావాలని ఆయన అన్నారు. నేటి రాజకీయాలు భ్రష్టు పట్టిపోయాయని ఆయన ఆవేదన వ్యక్తం చేశారు. వివక్ష లోని సమాజం ఏర్పడాలని ఆయన అన్నారు.

విద్య, ఆరోగ్యం సామాన్యులకు అందుబాటులోకి తేవడం రాజకీయాల లక్ష్యం కావాలని ఆయన అన్నారు. రాజకీయాలపై ప్రజలకు అసహ్యం వేసే పరిస్థితి ఉందని ఆయన అన్నారు. రాజకీయాల్లో మద్యం, డబ్బు రాజ్యమేలుతున్నాయని ఆయన విమర్శించారు. స్విస్ బ్యాంకుల్లో రాజకీయ నేతలు డబ్బులు దాచుకున్నారని, వాటిని ఎన్నికల్లో ఖర్చు పెట్టడానికి సిద్ధమవుతున్నారని ఆయన అన్నారు.