ఎన్టీఆర్ కు 4 వారాల విశ్రాంతి

హైదరాబాద్: రోడ్డు ప్రమాదంలో గాయపడిన సినీ నటుడు జూనియర్ ఎన్టీఆర్ కు నాలుగు వారాల విశ్రాంతి అవసరమని ఆయనకు వైద్యం చేస్తున్న డాక్టర్లు అంటున్నారు. జూనియర్ ఎన్టీఆర్ కు రోజూ ఫిజియో థెరపీ అవసరమని వారు చెబుతున్నారు. గతుకుల రోడ్డు మీద ప్రయాణం చేయడం, ముందుకు వంగడం జూనియర్ ఎన్టీఆర్ కు కుదరదని వారు శుక్రవారం ఉదయం మీడియా ప్రతినిధులతో చెప్పారు. ఎన్టీఆర్ పూర్తిగా కోలుకుంటున్నారని వారు చెప్పారు. ఛాతీకి, కండరాలకు ఎక్సర్ సైజ్ అవసరమని వారు చెప్పారు. తాను చికిత్స పొందుతున్న కిమ్స్ ఆస్పత్రి నుంచి ఆయన శుక్రవారం డిశ్చార్జీ అయ్యే అవకాశం ఉంది.

డాక్టర్ల సూచనలతో జూనియర్ ఎన్టీఆర్ ఇక ఎన్నికల ప్రచారంలో పాల్గొనే అవకాశం లేదు. అయితే ప్రచారానికి వెళ్తారా అని అడిగితే అది జూనియర్ ఎన్టీఆర్ వ్యక్తిగత విషయమని, తాము ఈ విషయంలో ఏమీ చెప్పలేమని వారు జవాబిచ్చారు. రెండో విడత ఎన్నికలు జరిగే ప్రాంతాల్లో ఆయన తెలుగుదేశం పార్టీకి ప్రచారం చేస్తారనే ప్రచారం సాగుతోంది. అయితే అది సాధ్యమయ్యే అవకాశాలు లేవని తేలిపోయింది. దీంతో జూనియర్ ఎన్టీఆర్ వీడియోలు రూపొందించి ప్రచారానికి వాడుకోవాలని తెలుగుదేశం పార్టీ ఆలోచిస్తున్నట్లు సమాచారం.