రాజశేఖర్ పై చిరు పార్టీ కేసు

విశాఖపట్నం: సినీ నటుడు రాజశేఖర్ పై చిరంజీవి నేతృత్వంలోని ప్రజారాజ్యం పార్టీ శ్రీకాకుళం జిల్లా టెక్కలిలో కేసు నమోదు చేశారు. పోలీసులు కేసు నమోదు చేశారు. కులాలను రెచ్చగొట్టే విధంగా రాజశేఖర్ మాట్లాడారని ఆరోపిస్తూ వారు ప్రజారాజ్యం పార్టీ నేతలు పోలీసులకు ఫిర్యాదు చేశారు. చిరంజీవి ఒక కులం ఓట్ల కోసం ప్రయత్నిస్తున్నారని రాజశేఖర్ వ్యాఖ్యానించారు. కేసు నమోదైన విషయం తెలిసిన వెంటనే రాజశేఖర్ విశాఖపట్నం నుంచి టెక్కలి వెళ్లారు. ఈ కేసులో బెయిల్ తీసుకోవడానికి ఆయన వచ్చారు.

తనపై ప్రజారాజ్యం పార్టీవారు కేసు పెట్టడంపై ఆయన టెక్కలికి బయలుదేరే ముందు తీవ్రంగా ప్రతిస్పందించారు. చిరంజీవి అలా చేస్తే తప్పు లేదు గానీ తాను మాట్లాడితే తప్పు వచ్చిందా అని ఆయన ప్రశ్నించారు. తాను టెక్కలి వెళ్లాలట, బెయిలు తీసుకోవాలట అని ఆయన అన్నారు. రాజశేఖర్ తన భార్య జీవితతో కలిసి కొద్ది రోజులుగా ఉత్తరాంధ్రలో కాంగ్రెసు తరఫున ప్రచారం చేస్తున్నారు. తమ పర్యటనల్లో వారు చిరంజీవిపై విమర్శలు గుప్పిస్తున్నారు.