'ఎన్టీఆర్ పిల్లాడు,బాబును శపించేవాళ్లం'

శ్రీశైలం: జూనియర్ ఎన్టీర్ చిన్నపిల్లవాడని, తమ శాపానికి ఫలితం ఉంటే జూనియర్ ఎన్టీఆర్ ను ఎందుకు శపిస్తాం, తెలుగుదేశం పార్టీ అధ్యక్షుడు నారా చంద్రబాబునాయుడినే శపించి ఉండేవాళ్లమని రాష్ట్ర ఆర్థిక మంత్రి కె. రోశయ్య అన్నారు. జూనియర్ ఎన్టీఆర్ కు కాంగ్రెసు దిష్టి తగిలి రోడ్డు ప్రమాదానికి గురయ్యాడని చంద్రబాబు చేసిన వ్యాఖ్యపై ఆయన ప్రతిస్పందించారు. ప్రముఖ జ్యోతిర్లింగ క్షేత్రమైన శ్రీశైలాన్ని ఆర్థిక మంత్రి రోశయ్య శుక్రవారం ఉదయం సందర్శించారు. ఈ సందర్భంగా ఆయన మీడియా ప్రతినిధులతో మాట్లాడారు.

జూనియర్ ఎన్టీఆర్ చిన్న పిల్లవాడు, ఎంతో భవిష్యత్తు ఉన్నవాడు, తాము జూనియర్ ఎన్టీఆర్ ను ఎందుకు శపిస్తామని ఆయన ప్రశ్నించారు. తమ శాపానికి బలమే ఉంటే తమ ప్రత్యర్థి అయిన చంద్రబాబునే శపించి ఉండేవాళ్లమని ఆయన అన్నారు. చంద్రబాబు అందగాడు, ప్రపంచ స్థాయి నాయకుడు, అంతర్జాతీయ స్థాయి గడ్డం ఉన్నవాడు అని ఆయన వ్యంగ్యంగా అన్నారు.

కాంగ్రెస్‌ మళ్లీ అధికారంలోకి రావాలని కోరుతూ ప్రత్యేక పూజలు నిర్వహించారు. నగదు బదిలీ పథకాన్ని అమలుచేసేందుకు ఎంత ఖర్చు అవుతుందో లెక్కలు వేసుకోవటం కూడా చంద్రబాబుకు తెలియదని అన్నారు. స్విస్‌ బ్యాంకుల్లో దాచిన డబ్బు తెచ్చి ఈ పథకం అమలుచేస్తామనటం హాస్యాస్పదమని అన్నారు. ఎన్టీఆర్‌ రెండు రూపాయలకు కిలో బియ్యం ఇస్తే దానికి 5 రూపాయల 25 పైసలు వసూలు చేసిన ఘనత చంద్రబాబుదేనని అన్నారు.