ఎన్టీఆర్ కు పోటీగా రాలేదు: రామ్ చరణ్

గుంటూరు: తాను జూనియర్ ఎన్టీఆర్ కు పోటీగా ప్రజారాజ్యం పార్టీకి ప్రచారం చేయడానికి ముందుకు రాలేదని ప్రజారాజ్యం పార్టీ అధినేత చిరంజీవి కుమారుడు, సినీ నటుడు రామ్ చరణ్ తేజా స్పష్టం చేశారు. తెలుగుదేశం పార్టీ ప్రచారానికి జూనియర్ ఎన్టీఆర్ ను తెచ్చింది కాబట్టి తాను ప్రజారాజ్యం పార్టీకి ప్రచారం చేయడానికి ముందుకు వచ్చినట్లు జరుగుతున్న ప్రచారంలో నిజం లేదని ఆయన అన్నారు. విజయవాడ నుంచి ఆయన సోమవారం తన ప్రజా రైలు యాత్రను కొనసాగించారు. తాను తన తండ్రి చిరంజీవికి ఉడుతా భక్తిగా సహాయపడడానికి మాత్రమే ముందుకు వచ్చానని ఆయన స్పష్టం చేశారు.

ప్రజారాజ్యం పార్టీ ఎన్నికల గుర్తు రైలింజన్ ను ప్రజలకు పరిచయం చేయడానికి రైలు యాత్ర సాగిస్తున్నట్లు ఆయన తెలిపారు.తమ పార్టీకి రైలింజన్ మాత్రమే ఉందని, బోగీలు లేవని వస్తున్న విమర్శలను ఆయన ఖండించారు. తమకు బోగీలు అవసరం లేదని, రాష్ట్రంలోని 7 కోట్ల ప్రజలే తమ రైలింజన్ బోగీలని ఆయన అన్నారు. పార్టీ నుంచి వెళ్లిపోయినవారంతా కలుపు మొక్కలేనని, అటువంటి వారు వెళ్లిపోవడమే మంచిదని ఆయన అన్నారు. పార్టీలో అటువంటి వారు ఉంటే దుష్ప్రభావం పడుతుందని ఆయన అన్నారు. తమ యాత్రకు మంచి స్పందన లభిస్తోందని ఆయన చెప్పుకున్నారు. ఎన్నికల్లో ప్రజారాజ్యం పార్టీ గెలిచి తీరుతుందని ఆయన చెప్పారు.