రాహుల్ ప్రధాని అవుతారు: ప్రియాంక

అమేథి: తన సోదరుడు ఏదో ఒక రోజు దేశ ప్రధాని అవుతారని కాంగ్రెస్ అధ్యక్షురాలు సోనియా గాంధీ కూతురు ప్రియాంకా గాంధీ జోస్యం చెప్పారు. ప్రధాని కావడానికి ఉండాల్సిన అన్ని లక్షణాలూ తన సోదరుడు రాహుల్‌ గాంధీకి ఉన్నాయని ఆమె అభిప్రాయపడ్డారు. రాహుల్ బాగా కష్టపడతాడని, ప్రధాని కావడానికి కావాల్సిన అర్హతలు రాహుల్ కున్నాయని ఆమె అన్నారు. అయితే అంతకన్నా ముందు అతడు పెళ్లికొడుకు కావాలని ఆమె అన్నారు. రాహుల్‌ పోటీ చేస్తున్న అమేథీ నియోజకవర్గంలోని అయోధ్యనగర్‌లో జరిగిన ఎన్నికల ప్రచార సభలో ఆమె మాట్లాడారు.

ఈసారి మాత్రం మన్మోహన్ సింగే ప్రధాని అవుతారని ఆమె మీడియా ప్రతినిధులతో అన్నారు. రాజకీయాల్లోకి ఎప్పుడు ప్రవేశిస్తారన్న ప్రశ్నకు- రాజకీయాల్లో ప్రవేశించడానికి తాను వ్యతిరేకం కాదని తెలిపారు. "ఎప్పటికీ చేరనని చెప్పను కాని..ప్రస్తుతానికైతే ఆ ఆలోచన లేదు" అని ఆమె జవాబిచ్చారు. ములాయం నేతృత్వంలోని సమాజ్‌వాదీ పార్టీ తిరోగమన పార్టీ అని ఆమె దుయ్యబట్టారు. నియోజకవర్గంలో చేపడుతున్న అభివృద్ధి పనులను ముందుకు తీసుకెళ్లేందుకు రాహుల్‌ గాంధీ మరో ఐదేళ్ల పాటు ఎంపీగా ఉండాలని చెప్పారు. తన తల్లి కంటే సోదరుడు రాహుల్‌కు ఎక్కువ ఓట్లు రావాలని తాను ఆశిస్తున్నట్లు తెలిపారు.