ప్రధాని పదవిపై ఆశ లేదు: జయ

చెన్నై: తనకు ప్రధాని కావాలని లేదని అన్నాడియంకె నేత జె.జయలలిత చెప్పారు. ఎన్నికల తర్వాత వామపక్షాలను, పిఎంకె, ఎండిఎంకె, ఇతర భావ సారూప్య పార్టీలను సంప్రదిస్తానని ఆమె చెప్పారు. వ్యక్తిగతంగా తనకు ప్రధాని పదవిపై ఆశ లేదని ఆమె చెప్పారు. దేశం సంపన్నం కావాలనేది, సూపర్ పవర్ గా ఎదగాలనేది తన ఆకాంక్ష అని ఆమె ఒక టీవీ చానెల్ కు ఇచ్చిన ఇంటర్వ్యూలో అన్నారు.

ఎన్నికల అనంతరం ప్రధాని పదవిని మీ పార్టీ ఆశిస్తుందా అని అడిగితే మంచి రాజకీయ నేత దేన్నీ కాదనబోడని, ఎన్నికల అనంతర సర్దుబాట్లపై ఇప్పుడే మాట్లాడడం తొందరపాటు అవుతుందని ఆమె అన్నారు. కాంగ్రెసేతర, బిజెపియేతర ప్రభుత్వాన్ని కేంద్రంలో ఏర్పాటు చేయాలనేది తమ ప్రయత్నమని ఆమె అన్నారు. పిఎంకె, ఎండిఎంకెలో పొత్తుతో తమ పార్టీ ఎన్నికల్లో ఘన విజయం సాధిస్తుందని ఆమె చెప్పారు.