నాకు ప్రాణహాని: పరకాల

హైదరాబాద్: తన ప్రాణాలకు ముప్పు ఉందని ప్రజారాజ్యం పార్టీకి రాజీనామా చేసిన పరకాల ప్రభాకర్ డిజిపి మహంతికి ఫిర్యాదు చేశారు. తనకు బెదిరింపు కాల్స్ వస్తున్నాయని ఆయన చెప్పారు. తనకు భద్రత కల్పించాలని ఆయన డిజిపిని కోరారు. ఆయన బుధవారం సాయంత్రం డిజిపిని కలిసి తనకు తనకు భద్రత కల్పించాలని కోరుతూ ఒక లేఖను అందించారు. తన మిత్రుల సలహా మేరకు తాను డిజిపిని కలిసి భద్రత కోరినట్లు ఆయన మీడియా ప్రతినిధులతో చెప్పారు. తన ఇంటిలోని ల్యాండ్ లైన్ కు ఫోన్ కాల్స్ వస్తున్నాయని, దీంతో తన తల్లి, తన కూతురు, తన భార్య తీవ్రంగా కలవరం చెందుతున్నట్లు ఆయన తెలిపారు.

తనకు బెదిరింపు కాల్స్ చేస్తున్నారనేది చెప్పలేనని, ల్యాండ్ లైన్ కు ఫోన్ కాల్స్ వస్తుండడంతో గుర్తించలేక పోతున్నానని ఆయన చెప్పారు. తాను ఇప్పటికే స్థానిక పోలీసు స్టేషనులో ఈ విషయం చెప్పానని, అయితే డిజిపిని కలిసి స్వయంగా విజ్ఞప్తి చేస్తే మంచిదని మిత్రులు సలహా ఇచ్చారని, దాంతో డిజిపిని కలిశానని ఆయన చెప్పారు.

ప్రజారాజ్యం పార్టీకి రాజీనామా చేసిన ఆయన ఆ పార్టీ వ్యవహారాలపై తీవ్రంగా ధ్వజమెత్తిన విషయం తెలిసిందే. ప్రజారాజ్యం పార్టీని ఆయన విషవృక్షంగా అభివర్ణించారు. ప్రజారాజ్యం పార్టీ సామాజిక న్యాయం పాటిస్తున్నట్లు చెబుకుంటున్న మాటల్లో ఏ మాత్రం నిజం లేదని ఆయన విమర్శించారు.