ఇక పులి షూటింగ్ లో పవన్

హైదరాబాద్: యువరాజ్యం అధినేత పవన్ కళ్యాణ్ రాజకీయాలకు కాస్తా విశ్రాంతినిచ్చి సినిమా షూటింగులో బిజీ కానున్నాడు. రాష్ట్రంలో తొలి విడత ఎన్నికల ప్రచారం ముగియడంతో ఆయన సినిమాపై దృష్టి పెట్టే ఆలోచనలో ఉన్నాడు. సోదరుడు చిరంజీవి ప్రజారాజ్యం పార్టీని స్థాపించడంతో ఆ పార్టీ కార్యకలాపాల్లో పీకల లోతు దాగా మునిగిపోయిన పవన్ పులి సినిమా షూటింగును మధ్యలోనే ఆపేసి యువరాజ్యం బాధ్యతలు చేపట్టాడు. చిరంజీవిని ముఖ్యమంత్రిగా చూడాలనే ఉద్దేశంతో ఆయన ఎన్నికల ప్రచారం సాగించాడు.

హైదరాబాదులో ఎన్నికల ప్రచారం చేస్తూ అస్వస్థతకు గురైన ఆయన ఆస్పత్రిలో చికిత్స పొంది ప్రస్తుతం ఇంట్లో విశ్రాంతి తీసుకుంటున్నాడు. ఇక సినిమా షూటింగ్ పై దృష్టి పెట్టబోతున్నాడు. పవన్ కళ్యాణ్ నటిస్తున్న పులి సినిమా భారీ అంచనాలతో మొదలైంది. ఈ సినిమాలో పవన్ పోలీసాఫీసర్ పాత్ర ధరిస్తున్నాడు. అంతేకాకుండా ద్విపాత్రాభినయం చేస్తున్నాడు. ఈ సినిమాకు సూర్య దర్శకత్వం వహిస్తుండగా, ఎఆర్ రెహ్మాన్ సంగీతాన్ని అందిస్తున్నాడు.