రెండు గంటల సినిమానా: చిరుకు వైయస్ ప్రశ్న

విజయవాడ‌: ప్రజా జీవితమంటే రెండు గంటల సినిమా, హీరోయిన్ తో నాలుగు డ్యూయెట్లు అని ప్రజారాజ్యం అధినేత చిరంజీవి అనుకుంటున్నారని ముఖ్యమంత్రి డాక్టర్ వైయస్ రాజశేఖర రెడ్డి వ్యాఖ్యానించారు. కృష్ణా జిల్లా గూడూరు ఎన్నికల ప్రచార సభలో ఆయన బుధవారంనాడు మాట్లాడారు. ప్రజా జీవితమంటే ప్రజా సమస్యలు అర్థం చేసుకోవడం, వాటిని పరిష్కరించే సత్తా, ధైర్యం ఉండడం అని ఆయన అన్నారు. ప్రజారాజ్యం పార్టీని అయోమ రాజ్యంగా ఆయన అభివర్ణించారు. చిరంజీవికి విషయాలపై అవగాహన లేదని ఆయన విమర్శించారు. నీటి పారుదల ప్రాజెక్టులు వద్దని చిరంజీవి అంటారని ఆయన అన్నారు. ప్రజారాజ్యాన్ని సినిమా పార్టీ అని కూడా ఆయన అభివర్ణించారు. టిక్కెట్లు అమ్ముకున్న ప్రజారాజ్యం పార్టీ ప్రజలకు న్యాయం చేయలేదని ఆయన అన్నారు.

తెలుగుదేశం పార్టీ అధ్యక్షుడు నారా చంద్రబాబు నాయుడిపై కూడా ఆయన తీవ్ర విమర్శలు చేశారు. వ్యవసాయం దండుగ అని చంద్రబాబు అంటే తాము పండుగ అని నిరూపించి చూపామని ఆయన అన్నారు. మోసపూరిత చంద్రబాబును నమ్మవద్దని ఆయన ప్రజలను కోరారు. అమ్మకు అన్నం పెట్టడు కానీ చిన్నమ్మకు బంగారు గాజులు చేయిస్తానని అన్నాడనే పద్ధతిలో చంద్రబాబు వ్యవహారం ఉందని ఆయన వ్యాఖ్యానించారు. తమను గద్దె దింపాలని ప్రతిపక్షాలు కుట్రలు చేస్తున్నాయని ఆయన విమర్శించారు. ప్రతిపక్షాలు మోసపూరిత, అసత్య వాగ్దానాలు చేస్తున్నాయని ఆయన అన్నారు. తమ ప్రభుత్వం చేపట్టిన అభివృద్ధి సంక్షేమ కార్యక్రమాలను ఆయన వివరించారు.