బాబుకు అర్హత లేదు: చిరు

విజయవాడ: తెలుగుదేశం పార్టీ అధ్యక్షుడు నారా చంద్రబాబు నాయుడుకు తనను అనే అర్హత లేదని ప్రజారాజ్యం పార్టీ అధినేత చిరంజీవి అన్నారు. నారావారిపల్లెకు చెందిన చంద్రబాబు చంద్రగిరి నియోజక వర్గం నుంచి కుప్పం నియోజకవర్గానికి ఎందుకు మారాడని ఆయన శుక్రవారం మీడియా ప్రతినిధుల సమావేశంలో ప్రశ్నించారు. చంద్రగిరిలో ఓడిపోయాడు కాబట్టే కుప్పం నియోజకవర్గానికి చంద్రబాబు మారారని ఆయన అన్నారు. తాము ఎన్నికల్లో ప్రభంజనం సృష్టిస్తామని ఆయన ధీమా వ్యక్తం చేశారు. స్వర్గీయ ఎన్టీ రామారావు చరిత్ర సృష్టించారని, తాము అదే పునరావృతం చేస్తామని ఆయన అన్నారు.

ప్రజలు మార్పు కోరుకుంటున్నారని, ఆ మార్పు తమ ద్వారా వస్తుందని నమ్ముతున్నారని, అందుకే తమను గెలిపిస్తారని ఆయన అన్నారు. తొలి విడత పోలింగ్ జరిగిన ప్రాంతాల్లో తమకు అత్యధిక స్థానాలు తమకే వస్తాయని ఆయన అన్నారు. తమకు 75 నుంచి 80 స్థానాలు వస్తాయని ఆయన చెప్పారు. ఉత్తరాంధ్రలోనే కాకుండా తెలంగాణలోనూ తమకు సీట్లు చాలా వస్తాయని ఆయన చెప్పారు. తమ ఓటర్లు చాలా తెలివైనవారని, తమను గెలిపించి తీరుతారని ఆయన అన్నారు.రాజకీయాల్లో చిరంజీవి రాణించడం లేదనే విమర్శను ఆయన కొట్టి పారేశారు. ఎవరో ఒకరి మీద బురద చల్లాలి కాబట్టి అల్లు అరవింద్ మీద విమర్శలు చేస్తున్నారని ఆయన అన్నారు.