నాపై కేసు కొట్టేయండి: కెసిఆర్

హైదరాబాద్‌: తనపై హైదరాబాదులోని బంజారాహిల్స్‌ పోలీసుస్టేషన్‌లో నమోదైన ఎస్సీ, ఎస్టీ కేసును కొట్టివేయాలంటూ తెలంగాణ రాష్ట్ర సమితి (తెరాస) అధినేత కె.చంద్రశేఖర్‌రావు హైకోర్టును కోరారు. పార్టీటికెట్‌ కోరిన తనను కులం పేరుతో దూషించారంటూ ఈనెల 14న కె.పి.రాంబాబు అనే వ్యక్తి కేసీఆర్‌పై ఎస్సీ, ఎస్టీ అత్యాచారాల నిరోధక చట్టం కింద కేసు పెట్టారు.

వాస్తవాలను పరిశీలించకుండా ఏకపక్షంగా నమోదు చేసిన ఆ కేసును కొట్టేయాలని కేసీఆర్‌ తన పిటిషన్‌లో విజ్ఞప్తి చేశారు. కేసు విచారణను నిలిపేస్తూ మధ్యంతర ఉత్తర్వులు ఇవ్వాలని అభ్యర్థించారు. మార్చి 28న ఘటన జరిగిందని రాంబాబు చెబుతున్నారని, సంఘటన జరిగిన చాలా రోజులకు ఏప్రిల్‌ 14దాకా ఎందుకు ఫిర్యాదు చేయలేదో అర్థం కావడం లేదన్నారు.