కెసిఆర్ అన్నదే చెప్పా: వైయస్

తిరుపతి: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అన్నదే తాను చెప్పానని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. తిరుమలేశుని సందర్శించుకున్న ఆయన శుక్రవారం మీడియా ప్రతినిధులతో మాట్లాడారు. తెలంగాణపై తాను చేసిన ప్రకటనపై వస్తున్న విమర్శలకు ఆయన వివరణ ఇచ్చారు. తెలంగాణలో కోస్తా విద్యా సంస్థలను మూసేస్తామని కెసిఆర్ అన్నారని, దాని గుర్తు చేస్తూ అటువంటి పార్టీతో తెలుగుదేశం పార్టీ పొత్తు పెట్టుకోవడం అవకాశవాద రాజకీయం కాదా అని తాను అన్నట్లు ఆయన వివరణ ఇచ్చారు. మనల్ని విదేశీయులులాగా చూస్తున్న తెరాసతో పొత్తు పెట్టుకోవడం తెలుగుదేశం పార్టీ అవకాశవాదం కాదా అని తాను అన్నట్లు ఆయన తెలిపారు.

తెలంగాణపై తాను మాట మార్చలేదని ఆయన చెప్పారు. తెలంగాణలో ఇతర ప్రాంతాల ఉండనీయమనే కెసిఆర్ ప్రకటన వాస్తవమని, దాన్నే తాను గుర్తు చేశానని ఆయన అన్నారు. ప్రజల భావోద్వేగాలను రెచ్చగొట్టడం తన ఉద్దేశం కాదని ఆయన అన్నారు. ప్రాంతీయ విద్వేషాలను రెచ్చగొట్టడం కూడా తన లక్ష్యం కాదని ఆయన అన్నారు.