ఎన్టీఆర్ తో ప్రచారం ఎందుకు?: బన్నీ

నెల్లూరు: రోడ్డు ప్రమాదంలో గాయపడి మంచంమీద ఉన్న వ్యక్తి ప్రచారం అవసరమైందంటే మహాకూటమికి ఏమాత్రం బలం ఉందో అర్థమవుతుందని సినీనటులు అల్లు అర్జున్‌, రాంచరణ్‌ తేజలు అన్నారు. జూనియర్ ఎన్టీఆర్ మంచం మీది నుంచి టీవీ చానెళ్ల ద్వారా ప్రజలను ఉద్దేశించి ప్రసంగించడంపై వారు ఆ విధంగా అన్నారు. నెల్లూరు జిల్లా కోవూరులో ప్రజారాజ్యం అసెంబ్లీ అభ్యర్థి మునెమ్మకు మద్దతుగా వారు ప్రచారం చేశారు. నడవలేని స్థితిలో ఉన్న జూనియర్‌ ఎన్టీఆర్‌కు స్క్రిప్టు ఇచ్చి వారికి కావలసినట్లు మాట్లాడించటం సరికాదని ఈ సందర్భంగా అన్నారు.

తెలుగుదేశం పార్టీ ఎన్నికల వాగ్దానాలు ఆచరణ యోగ్యం కాదని అన్నారు. స్వర్గీయ ఎన్టీఆర్‌ ప్రవేశపెట్టిన రెండు రూపాయలకు కిలో బియ్యం పథకం కొనసాగించలేని వ్యక్తి నెలకు రెండు వేలు ఇస్తానంటే ప్రజలు నమ్మబోరని అన్నారు. నగదు బదిలీ పథకాన్ని కూడా కొన్నాళ్లు ఇచ్చి ఆర్థికస్థితి కుంటుపడిందంటూ ఎత్తేయటం ఖాయమని వారన్నారు.