చిరు రైలు పట్టాలు తప్పింది: బాబు

చిత్తూరు: చిరంజీవి నేతృత్వంలోని ప్రజారాజ్యం పార్టీ పట్టాలు తప్పిందని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. బాలకృష్ణతో కలిసి ఆయన మంగళవారం తన సొంత నియోజకవర్గం కుప్పంలో ప్రచారం నిర్వహించారు. ప్రజారాజ్యం పార్టీలో ప్రజలే లేరని ఆయన అన్నారు. ప్రజారాజ్యం పార్టీ చిరునామా గల్లంతవుతుందని ఆయన అన్నారు. ప్రజారాజ్యం పార్టీ టిక్కెట్లు అమ్ముకుందని, సినిమా టిక్కెట్ల మాదిరిగా ఎన్నికల్లో టిక్కెట్లు అమ్ముకుందని ఆయన విమర్శించారు.

ముఖ్యమంత్రి డాక్టర్ వైయస్ రాజశేఖర రెడ్డిపై ఆయన తీవ్ర విమర్శలు చేశారు. కుప్పం నియోజకవర్గంలోని కాంగ్రెసు స్థానిక నాయకులకు హెచ్చరికలు చేశారు. స్థానిక నాయకుల ఆగడాలు మితిమీరిపోయాయని, వారి ఆగడాలు ఇలాగే కొనసాగితే చూస్తూ ఊరుకోబోమని ఆయన అన్నారు. తన తమ్ముళ్లను కాపాడుకునే సత్తా తనకు ఉందని ఆయన అన్నారు. తమ ముందు వారు ఎక్కడా నిలబడలేరని ఆయన అన్నారు.