రోజా కోటాలో చిరు ప్రచారం

హైదరాబాద్: తెలుగుదేశం పార్టీ అభ్యర్థి, తెలుగు మహిళ అధ్యక్షురాలు రోజా పోటీ చేస్తున్న చిత్తూరు జిల్లా చంద్రగిరి నియోజకవర్గంలో ప్రజారాజ్యం పార్టీ అధినేత చిరంజీవి ఎన్నికల ప్రచారం నిర్వహించారు. తమ పార్టీని గెలిపించాలని ఆయన ఓటర్లకు విజ్ఞప్తి చేశారు. అసెంబ్లీని వేదిక చేసుకుని ముఖ్యమంత్రి డాక్టర్ వైయస్ రాజశేఖర రెడ్డి, తెలుగుదేశం పార్టీ అధ్యక్షుడు చంద్రబాబు నాయుడు వ్యక్తిగత విమర్శలు చేసుకున్నారని, వారిని వారే బయట పెట్టుకున్నారని, వారి తీరు చూస్తే అసహ్యం వేస్తోందని ఆయన అన్నారు. వారు రాజకీయ వ్యాపారం చేస్తున్నారని ఆయన విమర్శించారు.

సెజ్‌ల పేరిట పేదవాడి వద్ద భూములు లాక్కున్న కాంగ్రెస్‌ నేలమట్టం కావటం ఖాయమని ప్రజారాజ్యం పార్టీ అధ్యక్షుడు చిరంజీవి అంతకు ముందు అన్నారు. తూర్పుగోదావరి జిల్లా కాకినాడలో జరిగిన ఎన్నికల బహిరంగసభలో పాల్గొన్న ఆయన నిశ్శబ్ద విప్లవం పవరేంటో ఫలితాల రోజు తెలుస్తుందన్నారు. తమ పార్టీ అధికారంలోకి రావటం ఖాయమన్నారు.