తెలంగాణపై వైఖరి అదే: కారత్

తిరుపతి: తెలంగాణపై తమ వైఖరిలో మార్పు లేదని సిపిఎం ప్రధాన కార్యదర్శి సిపిఎం ప్రకాష్ కారత్ స్పష్టం చేశారు. సోమవారం సాయంత్రం మహాకూటమి బహిరంగ సభలో పాల్గొనడానికి వచ్చిన ఆయన మంగళవారం ఉదయం మీడియా ప్రతినిధుల సమావేశంలో మాట్లాడారు. సిపిఎం సమైక్య రాష్ట్రానికే కట్టుబడి ఉన్న విషయం తెలిసిందే. రాష్ట్రంలో మహా కూటమి అధికారంలోకి రావడం ఖాయమని ఆయన ధీమా వ్యక్తం చేశారు. ఒరిస్సాలో, కర్నాటకలో ఆంధ్రప్రదేశ్ లో చేసిన మహా కూటమి ప్రయోగం లాంటిదే చేస్తున్నామని ఆయన చెప్పారు.

ఎన్నికల తరువాత కేంద్రంలో కాంగ్రెస్‌, బీజేపీయేతర ప్రభుత్వ ఏర్పాటు తథ్యమని ప్రకాష్‌కారత్‌ అన్నారు. యుపీఏలో కాంగ్రెస్‌ ఒంటరైందని, భారతీయ జనతా పార్టీ (బిజెపి) చాలా రాష్ట్రాల్లో ఖాతా తెరిచే పరిస్థితి లేదని అన్నారు. ఎన్నికల తరువాత ఎట్టి పరిస్థితిలోను తాము కాంగ్రెస్‌కు మద్దతు ఇచ్చేది లేదని స్పష్టం చేశారు. ప్రధాని పదవిపై తమకు ఆసక్తి లేదని అయితే తప్పనిసరైతే అందుకు సిద్ధమేనని అన్నారు. ఎన్నికల తర్వాతే కేంద్రంలో రాజకీయ పునరేకీకరణ సాధ్యమని ఆయన చెప్పారు.