బాబులా మాట్లాడితే జైలుకే: రోశయ్య

హైదరాబాద్‌: తెలుగుదేశం పార్టీ అధ్యక్షుడు నారా చంద్రబాబు నాయుడిలా మాట్లాడితే విదేశాల్లోనైతే జైల్లో పెడతారని రాష్ట్ర ఆర్థిక మంత్రి, కాంగ్రెసు సీనియర్ నేత కె.రోశయ్య వ్యాఖ్యానించారు. స్విస్ బ్యాంకు ఖాతాల గురించి మాట్లాడుతున్న చంద్రబాబు తీరుకు విదేశాల్లో జైల్లోనైనా పెడతారు లేదా పిచ్చాసుపత్రికైనా పంపిస్తారని ఆయన మంగళవారం మీడియా ప్రతినిధుల సమావేశంలో అన్నారు.

నగదు బదిలీ పథకం ద్వారా టీడీపీ ఓటర్లను ప్రలోభ పెడుతోందని ఆరోపిస్తూ రోశయ్య రాష్ట్ర ఎన్నికల ప్రధానాధికారికి ఫిర్యాదు చేశారు. అకౌంట్లు తెరవాలని, ఏటీఎం కార్డులు వస్తాయని అవి ఇలా ఉంటాయని రకరకాలుగా చెబుతూ ప్రజలను ప్రలోభపెడుతున్నారని అన్నారు. ఏడాదికి 36 వేల కోట్ల రూపాయలు ఖర్చయ్యే ఈ పథకం ఆచరణయోగ్యం కాదని అయినా ప్రజలను మోసగిస్తున్నారని అన్నారు. దీనిపై ఈసీ తక్షణమే స్పందించి చర్యలు తీసుకోవాలని ఆయన కోరారు.