రాష్ట్రంలో కీలకం మేమే: దత్తాత్రేయ

తిరుపతి: ఎన్నికల అనంతరం రాష్ట్రంలో ప్రభుత్వ ఏర్పాటులో తమదే కీలక పాత్ర అని భారతీయ జనతా పార్టీ (బిజెపి) అధ్యక్షుడు బండారు దత్తాత్రేయ అన్నారు. రాష్ట్రంలో ఏ పార్టీకి కూడా ప్రభుత్వ ఏర్పాటుకు పూర్తి మెజారిటీ రాదని, అప్పుడు ప్రభుత్వ ఏర్పాటులో తామే ప్రధాన పాత్ర వహిస్తామని ఆయన అన్నారు. తిరుపతిలో పార్టీ అభ్యర్థుల విజయాన్ని కాంక్షిస్తూ బిజెపి పార్టీ స్కూటర్‌ ర్యాలీ నిర్వహించింది. పార్టీ అధ్యక్షుడు బండారు దత్తాత్రేయ, ఆ పార్టీ శాసనసభా పక్షనేత కిషన్‌ రెడ్డిలు ఈ ర్యాలీలో పాల్గొన్నారు. ఈ సందర్భంగా దత్తాత్రేయ మీడియా ప్రతినిధులతో మాట్లాడారు.

కాంగ్రెస్‌, మహాకూటమి, ప్రజారాజ్యం పార్టీలకు వారు చెప్పుకుంటున్న స్థాయిలో మెజారిటీ రాదని హంగ్‌ తప్పదని దత్తాత్రేయ అన్నారు. ముఖ్యమంత్రి డాక్టర్ వైయస్ రాజశేఖర రెడ్డి తిరిగి అధికారంలోకి రాలేరని ఆయన అన్నారు. మహాకూటమికి కూడా మెజారిటీ రాదని, ప్రజారాజ్యం పరిస్థితి కూడా అదేనని ఆయన అన్నారు. ఈ వాతావరణంలో తాము కీలక పాత్ర పోషించే స్థితి వస్తుందని ఆయన అన్నారు.