వారికి మద్దతివ్వం: నవీన్

భువనేశ్వర్: కాంగ్రెస్, బిజెపిల ప్రభుత్వాలను కేంద్రంలో బలపరిచే ప్రసక్తి లేదని బిజెడి నేత, ఒరిస్సా ముఖ్యమంత్రి నవీన్ పట్నాయక్ స్పష్టం చేశారు. బిజెపి, కాంగ్రెసులకు ప్రభుత్వాల ఏర్పాటుకు ఎన్నికల అనంతరం మద్దతిచ్చే ప్రసక్తి లేదని ఆయన అన్నారు. గురువారంనాడు ఆయన తన ఓటు హక్కును వినియోగించుకున్నారు. ఈ సందర్భంగా ఆయన మీడియా ప్రతినిధులతో మాట్లాడారు. శాసనసభ ఎన్నికల్లో తమకు పూర్తి మెజారిటీ రాకపోతే బిజెపి మద్దతు తీసుకోబోమని ఆయన చెప్పారు.

సొంతంగా ప్రభుత్వం ఏర్పాటు చేయడానికి అవసరమైన మెజారిటీ తమకు వస్తుందనే నమ్మకం తనకు ఉందని ఆయన చెప్పారు. కంధమాల్ హింస తర్వాత బిజెపితో తెగదెంపులు చేసుకున్నామని ఆయన చెప్పారు. కంధమాల్ హింస తర్వాత బిజెపితో కొనసాగడం అసాధ్యంగా మారిందని ఆయన చెప్పారు. ప్రధాని పదవికి శరద్ పవార్ ను గానీ వామపక్ష నేతను గానీ బలపరుస్తారా అని అడిగితే ప్రధాని అభ్యర్థి తగిన విధంగా ఉంటే, ఒరిస్సాకు హేతుబద్దం అనిపిస్తే పరిశీలిస్తామని ఆయన జవాబిచ్చారు. మీ పేరు ప్రధాని పదవి అభ్యర్థిగా ముందుకు వస్తే అంగీకరిస్తారా అని అడిగితే తనకు అలాంటి ఆశలు గానీ కలలు గానీ లేవని ఆయన సమాధానమిచ్చారు.