అస్సాంలో ఓటు వేసిన మన్మోహన్

గౌహతి: ప్రధాని డాక్టర్ మన్మోహన్ సింగ్ తన సతీమణి గురశరన్ కౌర్ తో కలిసి గురువారంనాడు అసోం రాష్ట్రంలోని గౌహతిలో తన ఓటు హక్కును వినియోగించుకున్నారు. ఆయన తన భార్యతో కలిసి గురువారం ఉదయం 11 గంటల ప్రాంతంలో బార్డోలీ అంతర్జాతీయ విమానాశ్రయానికి చేరుకున్నారు. అనంతరం చాపర్ లో ఖానాపరా చేరుకున్నారు. అక్కడి నుంచి వారు డిస్పూర్ లోని ప్రభుత్వ ఉన్నత పాఠశాలలోని పోలింగ్ కేంద్రానికి వెళ్లి ఓటు వేశారు. ఈ సందర్భంగా గట్టి భద్రతా ఏర్పాట్లు చేశారు.

అసోం నుంచి ఆయన రాజ్యసభకు ఎన్నికయ్యారు. ఓటర్ల జాబితాలో మన్మోహన్ సీరియల్ నెంబర్ 726 కాగా, కౌర్ సీరియల్ నెంబర్ 727. అనంతరం అదే పద్ధతిలో వెనక్కి తిరిగి వెళ్లారు. మన్మోహన్ 2004లో జరిగిన లోకసభ ఎన్నికల్లోనూ, 2006లో జరిగిన శాసనసభ ఎన్నికల్లోనూ ఓటు వేశారు.