రెండో దశ: పోలింగ్ ప్రారంభం

హైదరాబాద్: రాష్ట్రంలో రెండవ దశ ఎన్నికల పోలింగ్ గురువారం ఉదయం ప్రారంభమైంది. రాష్ట్రంలోని 140 అసెంబ్లీ స్థానాలకు, 20 లోకసభ స్థానాలకు గురువారం పోలింగ్ జరుగుతోంది. పోలింగ్ సందర్భంగా పలు చోట్ల ఇవియంలు మొరాయించాయి. తొలి విడతలో మాదిరిగానే రెండో దశలో కూడా ఇవియంలు మొరాయించడం పట్ల తీవ్ర అసంతృప్తి వ్యక్తమవుతోంది. ఇవియంల మొరాయింపు వల్ల పలు చోట్ల పోలింగ్ ఆలస్యంగా ప్రారంభమైంది.

తిరుపతిలో ఇవియంలు మొరాయించాయి. దీంతో పోలింగ్ ఆలస్యంగా ప్రారంభమైంది. గుంటూరు జిల్లా ఆరండల్ పేట 183 నెంబరు బూతులో కూడా ఇవియంలు పని చేయలేదు. కృష్ణా జిల్లా ఆరండల్ పేటలో ఉదయం 8 గంటల వరకు కూడా పోలింగ్ ప్రారంభం కాలేదు. కడప జిల్లాలో ఒక్కచోట కాంగ్రెసు, తెలుగుదేశం పార్టీల కార్యకర్తల మధ్య ఘర్షణ చెలరేగింది. దీంతో పోలీసులు గాల్లోకి కాల్పులు జరిపారు. అనంతపురంలోని 108 నెంబరు బూతులో కూడా ఇవియంలు మొరాయించాయి.