'హంగ్ వచ్చినా చిరంజీవే సిఎం'

పాలకొల్లు: ప్రజారాజ్యం పార్టీకి కనిష్ఠంగా 95 స్థానాలు, గరిష్ఠంగా 120 స్థానాలు లభిస్తాయని, సింగిల్ లార్జెస్ట్ పార్టీగా నిలబడనున్న పీఆర్పీ ప్రభుత్వాన్ని ఏర్పాటు చేస్తుందని ఆ పార్టీ నాయకుడు చేగొండి హరిరామజోగయ్య చెప్పారు. పశ్చిమగోదావరి జిల్లా పాలకొల్లులోని తన నివాసంలో ఆదివారం విలేఖరులతో మాట్లాడారు. తమకు అందిన సమాచారం ప్రకారం రాష్ట్రంలో చిరుగాలి వీస్తోందని, బహుశా 150 స్థానాలను కైవసం చేసుకునే అవకాశం కూడా ఉందని తెలిపారు. అలా జరిగితే తామే సొంతంగా ప్రభుత్వం ఏర్పాటు చేస్తామని పేర్కొన్నారు.

ఒకవేళ హంగ్‌ ఏర్పడినా చిరంజీవే సీఎం అవుతారని జోస్యం చెప్పారు. ప్రభుత్వ ఏర్పాటుకు అప్పటి అవసరాన్ని బట్టి టీడీపీ, కాంగ్రెస్‌, టీఆర్‌ఎస్‌, లెఫ్ట్‌ పార్టీలు లేదా స్వతంత్రుల నుంచి మద్దతు కూడగట్టుకుంటామని జోగయ్య తెలిపారు. తిరుపతిలోను, పాలకొల్లులోను చిరంజీవి ఘనవిజయం సాధిస్తారన్నారు. తిరుపతిలో చిరంజీవిపై కాంగ్రెస్‌ దుండగులు జరిపిన అమానుషం వల్ల రాష్ట్రమంతా తమ పార్టీపై సానుభూతి పెరిగి విజయానికి దోహద పడిందని పేర్కొన్నారు.