కోడ్ ఉల్లంఘనపై జయప్రదకు నోటీసు

లక్నో: సినీ నటి, ఉత్తరప్రదేశ్ లోని రాంపూర్ లోకసభ అభ్యర్థి జయప్రదకు నోటీసు జారీ అయింది. ఎన్నికల ప్రవర్తనా నియమావళిని ఉల్లంఘించినందుకు ఈసి ఆమెకు ఈ నోటీసు జారీ అయింది. రాంపూర్ లోని స్వార్ ప్రాంత మహిళలకు బిందీలు పంపిణీ చేసినందుకు రాంపూర్ జిల్లా అధికార యంత్రాంగం ఈ నోటీసు జారీ చేసినట్లు సబ్ డివిజనల్ మెజిస్ట్రేట్ బిపి సింగ్ సోమవారం చెప్పారు.

ఆదివారం సాయంత్రం ఈ నోటీసు జారీ అయింది. జవాబు ఇవ్వడానికి జయప్రదకు సోమవారం సాయంత్రం వరకు గడువు ఇచ్చారు. గడువులోగా సమాధానం ఇవ్వకపోతే జయప్రదపై కేసు నమోదు చేస్తామని సింగ్ చెప్పారు. రాంపూర్ లక్నోకు 250 కిలోమీటర్ల దూరంలో ఉంటుంది.