పార్టీ వేడుకలకు కెసిఆర్ దూరం

హైదరాబాద్‌: తెలంగాణ రాష్ట్ర సమితి (తెరాస) తొమ్మిదవ వార్షికోత్సవ వేడుకలు సోమవారం హైదరాబాదులోని పార్టీ కార్యాలయం తెలంగాణా భవన్‌లో సాదాసీదాగా జరిగాయి. పార్టీ వార్షికోత్సవ వేడుకలకు తెరాస అధ్యక్షుడు కె. చంద్రశేఖర రావు దూరంగా ఉన్నారు. తెలంగాణకు మద్దతు కూడగట్టడానికి ఆయన సోమవారం సాయంత్రం ఢిల్లీకి వెళ్తున్నారు. ఆయనతో పాటు ఆయన కుమారుడు కె.టి.రామారావు కూడా ఉంటారు. పది రోజుల పాటు ఆయన అక్కడే మకాం వేస్తారు.

పార్టీ కార్యాలయంలో తెరాస నేతలు నాయని నర్సింహారెడ్డి, హరీష్‌ రావు తదితరులు తెలంగాణా తల్లి విగ్రహానికి పూలమాలలు వేసి నివాళులు అర్పించారు. అనంతరం పార్టీ జెండాను ఆవిష్కరించారు. కేక్‌ కట్‌ చేసి పంచారు. ఈసారి తెలంగాణ రావడం ఖాయమని నాయని నర్సింహా రెడ్డి అన్నారు. తెలంగాణ రాష్ట్ర ఏర్పాటుకు శాసనసభలో తీర్మానం ప్రవేశపెడతామని ఆయన చెప్పారు. ఎన్నికల ఫలితాల తర్వాత పార్టీ వార్షికోత్సవ వేడుకలను ఘనంగా నిర్వహిస్తామని ఆయన చెప్పారు.