మిత్రాకు చిరంజీవి బుజ్జగింపులు

హైదరాబాద్: పార్టీని వీడిపోతానని చెప్పిన డాక్టర్ మిత్రాను ప్రజారాజ్యం పార్టీ అధినేత చిరంజీవి బుజ్జగిస్తున్నారు. తాను పార్టీకి రాజీనామా చేస్తానని మిత్రా సోమవారంనాడు చిరంజీవిని కలిసి చెప్పారు. పార్టీ వ్యవహారాల పట్ల తీవ్ర అసంతృప్తితో ఉన్న మిత్రా పార్టీకి దూరం కావడం తప్పదని చాలా రోజులుగా ప్రచారం జరుగుతోంది. ఎన్నికలు ముగిసే వరకు ఓపిక పట్టి ఆయన తన అభిమతాన్ని పార్టీ అధినేత ముందు ఉంచారు.

పార్టీకి రాజీనామా చేయవద్దని ప్రజారాజ్యం రాజకీయ వ్యవహారాల కమిటీ మిత్రాపై ఒత్తిడి తెస్తున్నట్లు సమాచారం. ఆంజనేయరెడ్డి, పరకాల ప్రభాకర్ వంటి నాయకులు ప్రజారాజ్యం పార్టీకి రాజీనామా చేసిన నేపథ్యంలో మిత్రా కూడా అదే దారి పడుతారని ఊహాగానాలు చెలరేగుతూ వచ్చాయి. ఈ స్థితిలో చిరంజీవి మిత్రాపై వ్యంగ్యమైన వ్యాఖ్యలు కూడా చేశారు. మీరు పార్టీలోనే ఉన్నారా అని చిరంజీవి మీడియా ప్రతినిధుల సమావేశంలో ప్రశ్నించడం మిత్రాను తీవ్ర ఇబ్బందులకు గురి చేసింది. ఎన్నికలు జరుగుతున్న సమయంలో పార్టీని వీడిపోవడం ధర్మం కాదనే ఉద్దేశంతో ఆయన ఇంత కాలం ఆగినట్లు చెబుతున్నారు.