లాడెన్ మరణించాడు: జర్దారీ

ఇస్లామాబాద్: ఆల్ ఖైదా నేత ఒసామా బిన్ లాడెన్ మరణించినట్లు పాకిస్తాన్ అధ్యక్షుడు ఆసిఫ్ అలీ జర్దారీ సోమవారం ప్రకటించారు. పాకిస్తాన్ నిఘా వర్గాలు కూడా ఇదే విషయాన్ని చెబుతున్నట్లు ఆయన తెలిపారు. అయితే లాడెన్ మరణించినట్లు సాక్ష్యాధారాలు ఏవీ లేవని ఆయన అన్నారు.

తమకు తెలియదని అమెరికన్లు చెబుతున్నారని, లాడెన్ ను గుర్తించడానికి తమ వద్ద కన్నా అమెరికన్ల వద్ద ఎక్కువ సంపత్తి ఉందని ఆయన చెప్పారు. లాడెన్ మరణించినట్లు మాత్రం తమ నిఘా వర్గాలు చెబుతున్నాయని ఆయన మీడియా ప్రతినిధులతో చెప్పారు. సాక్ష్యాధారాలు లేనందను దాన్ని వాస్తవంగా పరిగణించాల్సిన అవసరం లేదని ఆయన అన్నారు. అతను మరణించాడా, లేదా అనే దానికన్నా అతని జాడ తెలియడం లేదనేది వాస్తవమని ఆయన అన్నారు. మనం కల్పనకు, వాస్తవానికి మధ్య ఉన్నామని ఆయన వ్యాఖ్యానించారు.