అర్థం కాకే నాపై దుమ్ము: వైయస్

న్యూఢిల్లీ: అవగాహన లేనివారే తాను తెలంగాణపై చేసిన వ్యాఖ్యలను తప్పు పడుతున్నారని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. ఢిల్లీలో ఆయన సోమవారం కాంగ్రెస్ సీనియర్ నేత మోతీలాల్ వోరాను కలిశారు. తాను తెలంగాణపై చేసిన వ్యాఖ్యలపై ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ వివరణ ఇచ్చిన విషయాన్ని ఆయన గుర్తు చేశారు. మహా కూటమి అధికారంలోకి వస్తే అందులోని శక్తుల వల్ల ఇబ్బందులు ఏర్పడతాయనేది తన వ్యాఖ్యల ఆంతర్యమని ఆయన చెప్పారు.

తమ కాంగ్రెసు పార్టీ 230 శాసనసభా స్థానాలు, 36కు పైగా లోకసభ స్థానాలు వస్తాయని ఆయన మరోసారి చెప్పారు. రాష్ట్రంలో హంగ్ రాదని, తాము ఒంటరిగానే ప్రభుత్వాన్ని ఏర్పాటు చేస్తామని ఆయన అన్నారు. విజయంపై ముఖ్యమంత్రి ధీమాగా ఉన్నారని, కాంగ్రెస్ ప్రభుత్వాన్ని ఏర్పాటు చేస్తామని చెబుతున్నారని మోతీలాల్ వోరా అన్నారు.