సోనియా సంతృప్తి చెందారు: డిఎస్

న్యూఢిల్లీ: రాష్ట్ర ఎన్నికల్లో కాంగ్రెసు తీరుపై తమ పార్టీ అధ్యక్షురాలు సోనియా గాంధీ సంతృప్తి చెందినట్లు ప్రదేశ్ కాంగ్రెస్ కమిటీ (పిసిసి) అధ్యక్షుడు డి.శ్రీనివాస్ చెప్పారు. రాష్ట్రంలో పార్టీ ప్రోగ్రెస్ రిపోర్టు సోనియాకు సమర్పించినట్లు ఆయన తెలిపారు. ముఖ్యమంత్రి డాక్టర్ వైయస్ రాజశేఖర రెడ్డి అనంతరం డి.శ్రీనివాస్ మంగళవారం ఉదయం సోనియా గాంధీని కలిసి చర్చలు జరిపారు. తమ అంచనాలను సోనియాకు వివరించామని, ఆమె సంతృప్తి వ్యక్తం చేశారని ఆయన అన్నారు. రాష్ట్రంలో కాంగ్రెసు తీరుపై ఆమె ఎప్పుడూ సంతోషంగానే ఉన్నారని ఆయన ఒక ప్రశ్నకు సమాధానంగా చెప్పారు.

తాము రాష్ట్రంలో కచ్చితంగా 30 లోకసభ స్థానాలను గెలుచుకుంటామని ఆయన ధీమా వ్యక్తం చేశారు. ప్రజలు ఓట్లేశారని, ఫలితాలు ఇంకా వెలువడలేదని, ఇప్పుడు రాబోయే ఫలితాల గురించి చెప్పడం సరి కాదని, అయితే ఎవరి అంచనాలు వారికి ఉంటాయని, తమ అంచనాలు తమకు ఉన్నాయని ఆయన అన్నారు. తమ అంచనాలను మాత్రమే సోనియాకు వివరించినట్లు ఆయన తెలిపారు.

తొలుత ఒకేసారి రాజశేఖర రెడ్డి, డి.శ్రీనివాస్ లతో సమావేశం కావాలని భావించిన సోనియా తర్వాత వారితో విడివిడిగా సమావేశమయ్యారు. రాష్ట్రంలో హంగ్ అసెంబ్లీ వస్తుందని అంచనాలు వెలువడుతున్న సమయంలో తమతో కలిసి వచ్చే పార్టీలపై ఆమె డి.శ్రీనివాస్ తో ఆరా తీసినట్లు సమాచారం. ఒక వేళ హంగ్ అసెంబ్లీ ఏర్పడితే అనుసరించాల్సిన వ్యూహంపై కూడా ఆమె డిఎస్ ను అడిగి తెలుసుకున్నట్లు సమాచారం.