జైలుకు వెళ్లేందుకైనా సిద్ధమే: మోడీ

ఆనంద్‌(గుజరాత్‌): గోద్రా అనంతరం చెలరేగిన అల్లర్లలో తన ప్రమేయం ఉందని రుజువైతే జైలుకు వెనక్కి వెళ్లేందుకైనా సిద్ధమని గుజరాత్‌ ముఖ్యమంత్రి నరేంద్రమోడీ ఉద్ఘాటించారు. తనను జైలు పాలు చేసేందుకు కాంగ్రెస్‌ కుట్రపన్నుతోందని మండిపడ్డారు. గోద్రా అనంతర అల్లర్లను ప్రేరేపించి, మద్దతు పలికారంటూ నరేంద్రమోడీ, ఆయన మంత్రివర్గ సహచరులు, అధికారులపై వచ్చిన ఫిర్యాదుపై దర్యాప్తుచేసి, మూడు నెలల్లో నివేదిక ఇవ్వాలని సుప్రీంకోర్టు సోమవారం ప్రత్యేక దర్యాప్తు బృందాన్ని(సిట్‌) ఆదేశించిన విషయం తెలిసిందే. గుజరాత్‌ ప్రజల కోసం జైలుకు వెళ్లేందుకు భయపడేది లేదని అన్నారు. మూడు నెలల తర్వాత ఒక వేళ తాను జైల్లో ఉండవచ్చునని, మోడీ గుజరాత్‌ కోసం జీవిస్తాడు, గుజరాత్‌ కోసం మరణిస్తాడని గుజరాత్ ప్రజలు గుర్తుంచుకోవాలని ఆనయ అన్నారు.

జైలుకు వెళతావా? లేదా ఉరికంబం ఎక్కుతావా? అని ప్రజలు నన్ను ప్రశ్నిస్తే కచ్చితంగా నేను ఉరినే ప్రేమిస్తానని, ఎందుకంటే మళ్లీ జన్మించి గుజరాత్‌ ప్రజలకు సేవ చేస్తానని ఆయన అన్నారు. కాంగ్రెస్‌ కు వ్యతిరేకంగా మాట్లాడటం ఆపకపోతే జైలుకు పోవాల్సి ఉంటుందని కేంద్ర మంత్రి కపిల్‌ సిబాల్‌ నన్ను హెచ్చరించారని, గోద్రా తదనంతర అల్లర్లపై సుప్రీంకోర్టు సిట్‌కు ఆదేశాలు జారీచేయకముందు 15రోజుల కిందట ఈ సంఘటన జరిగిందని, దీని అర్థమేమిటని, తనను జైలుకు పంపేందుకు కాంగ్రెస్‌ పన్నుతున్న కుట్ర కాదా ఇది అని మోడీ అన్నారు. ఉగ్రవాదానికి వ్యతిరేకంగా నేను సాగిస్తున్న పోరాటం కొనసాగుతూనే ఉంటుంది. 'ఢిల్లీ సుల్తానులు' నన్ను జైల్లో బంధించినా, నా పోరాటం ఆగదు' అని ఆయన అన్నారు.