అధికారం మాదే: చంద్రబాబు

హైదరాబాద్: రాష్ట్రంలో అధికారం తమదేనని తెలుగుదేశం పార్టీ అధ్యక్షుడు నారా చంద్రబాబు నాయుడు ధీమా వ్యక్తం చేశారు. ఎన్నికల్లో తమ మహాకూటమి మెజారిటీ సాధిస్తుందని ఆయన అన్నారు. తమ పారటీ నేతృత్వంలో సిపిఎం, సిపిఐ, తెలంగాణ రాష్ట్ర సమితి (తెరాస)లతో ఏర్పాటైన మహాకూటమి రాష్ట్రంలో మెజారిటీ సీట్లు సాధిస్తుందని ఆయన అన్నారు. మేడే సందర్భంగా పార్టీ కార్యాలయంలో శుక్రవారం ఏర్పాటైన సమావేశంలో ఆయన ప్రసంగించారు.

ప్రపంచాన్ని ఆర్థిక మాంద్యం చుట్టుముట్టిన ప్రస్తుత తరుణంలో తాము ప్రకటించిన పథకాలు బడుగుల జీవితాలను బాగు చేస్తాయని ఆయన అన్నారు. తాము అధికారంలోకి వస్తే పేదలకు లక్ష రూపాయలతో ఇళ్లు నిర్మించి ఇస్తామని ఆయన చెప్పారు. అసంఘటిత కార్మికుల ప్రయోజనాల కోసం తాము కార్యక్రమాలు చేపడుతామని కూడా ఆయన చెప్పారు. వచ్చే మేడే నాటికి ప్రజల జీవితాల్లో వెలుగులు నింపుతామని ఆయన అన్నారు. ఐదేళ్ల కాంగ్రెస పాలన రాష్ట్రంలో ఆర్థిక అసమానతలను పెంచిందన్నారు. తాము అధికారంలోకి రాగానే అసంఘటిత రంగంలో పనిచేస్తున్న కార్మికులకు రెండు లక్షల రూపాయల ప్రమాదభీమా, వృద్ధులకు పింఛన్‌ సౌకర్యం కల్పిస్తామని ఆయన హామీ ఇచ్చారు.