అవినీతికిదే నిదర్శనం: చిరు

హైదరాబాద్: రాష్ట్ర ప్రభుత్వ అవినీతికి కర్నూలు జిల్లాలో నిర్మాణంలో ఉన్న వంతెన కూలిపోవడమే నిదర్శనమని ప్రజారాజ్యం అధినేత చిరంజీవి అన్నారు. బాల కార్మికులతో పని చేయిస్తున్నారని, వంతెన కూలిన ఘటనలో ఆ విషయం స్పష్టంగా తెలుస్తోందని ఆయన శుక్రవారంనాడు అన్నారు. పార్టీకి అనుబంధంగా కార్మిక రాజ్యం, కర్షక రాజ్యం సంస్థలను ఏర్పాటు చేయనున్నట్లు ఆయన తెలిపారు.

ప్రజారాజ్యం పార్టీ అసెంబ్లీ, పార్లమెంటు అభ్యర్థులతో పార్టీ అధినేత చిరంజీవి జరుపుతున్న సమీక్షా సమావేశాలు వరుసగా మూడోరోజూ శుక్రవారం కూడా కొనసాగాయి. శుక్రవారం అనంతపురం, ఆదిలాబాద్‌ జిల్లాల అభ్యర్థులు, నాయకులతో చిరంజీవి సమావేశమయ్యారు. పార్టీ జయాపజయాలు, పోలింగ్‌ సరళిపై చర్చించారు. ప్రధానంగా మహిళలు, యువత ఎక్కువ సంఖ్యలో పీఆర్పీకి మద్దతు ఇచ్చినట్లు అభ్యర్థులు చిరంజీవి దృష్టికి తీసుకొచ్చారు. రెబల్స్‌ ప్రభావం పార్టీపై ఏ మేరకు పడుతుందనే విషయాన్ని చిరంజీవి ఆరా తీశారు.