సిఎం రేసులో లేను: డిఎస్

హైదరాబాద్: తాను ముఖ్యమంత్రి పదవి రేసులో లేనని ప్రదేశ్ కాంగ్రెస్ కమిటీ (పిసిసి) అధ్యక్షుడు డి.శ్రీనివాస్ స్పష్టం చేశారు. మీడియా అనవసరంగా ప్రజలను అయోమయానికి గురి చేస్తోందని ఆయన శుక్రవారం మీడియా ప్రతినిధుల సమావేశంలో వ్యాఖ్యానించారు. మళ్లీ వైయస్ రాజశేఖర రెడ్డే ముఖ్యమంత్రి అవుతారని ఆయన అభిప్రాయపడ్డారు. అయినా తమ పార్టీ అధ్యక్షురాలు సోనియా గాంధీ, పార్టీ అధిష్ఠానం ఆ విషయంపై నిర్ణయం తీసుకుంటారని ఆయన చెప్పారు. రాష్ట్రంలో హంగ్ అసెంబ్లీ రాదని, తమకు సొంతంగా ప్రభుత్వాన్ని ఏర్పాటు చేసే మెజారిటీ వస్తుందని ఆయన అన్నారు.

కేంద్రంలో ప్రభుత్వం ఏర్పాటుకు అవసరమైతే తెలంగాణ రాష్ట్ర సమితి (తెరాస) మద్దతు తీసుకుంటామని ఆయన చెప్పారు. యుపిఎ అయినా, ఎన్డీయె అయినా ఫరవాలేదు తెలంగాణ ఇచ్చేవారితో కలుస్తామని తెరాస అధ్యక్షుడు కె.చంద్రశేఖర రావు చెప్పారని, అందువల్ల కేంద్రంలో తెరాస మద్దతు తీసుకోవడానికి తమ పార్టీకి అడ్డంకులేమీ లేవని ఆయన అన్నారు. తెలంగాణ రాష్ట్ర ఏర్పాటుకు తమ పార్టీ అధిష్ఠానవర్గం నిర్ణయం తీసుకుంటుందని ఆయన చెప్పారు. ముఖ్యమంత్రి డాక్టర్ వైయస్ పనితీరు బాగుందని ఆయన అభిప్రాయపడ్డారు.