బాలయ్య సినిమాలు చూస్తా: పురంధేశ్వరి

విశాఖపట్నం: రాజకీయాలు, కుటుంబం వేర్వేరు అని విశాఖపట్నం కాంగ్రెస్‌ లోక్‌ సభ అభ్యర్థి దగ్గుపాటి పురందేశ్వరి పేర్కొన్నారు. విశాఖపట్నం వచ్చిన ఆమె గురువారం కొద్దిసేపు మీడియా ప్రతినిధులతో మాట్లాడారు. బాలకృష్ణ సినిమాలు మీరు చూస్తారా? అని ఒక విలేఖరి ప్రశ్నించగా, పార్టీల పరంగా తాము వేరైనా కుటుంబం దగ్గరకు వచ్చేసరికి అంతా కలిసే వుంటామని ఆమె జవాబిచ్చారు. తమ్ముడి సినిమాలు చూస్తుంటానని పురందేశ్వరి సమాధానమిచ్చారు.

రాష్ట్రంలోను, కేంద్రంలోను కాం గ్రెస్‌ పార్టీయే ప్రభుత్వం ఏర్పాటు చేస్తుందని ఆమె ధీమా వ్యక్తంచేశారు. మూడవ ఫ్రంట్‌ కే అతీగతీ లేదని, ఇక నాలుగవ ఫ్రంట్‌ కు అవకాశం ఎక్కడిదని ప్రశ్నించారు. రాష్ట్రంలో మహాకూటమిలోని పార్టీలకు భావసారూప్యత లేదని, అవి ఎంతకాలం కలిసి వుంటాయో వారికే తెలియదని వ్యాఖ్యానించారు. తెలంగాణలో కాంగ్రెస్‌ కు 60 స్థానాలు వస్తాయని ఆమె అన్నారు.