బిజెపిపై విరుచుకుపడిన మన్మోహన్

జలాలాబాద్ (పంజాబ్): భారతీయ జనతా పార్టీ (బిజెపి) కాంగ్రెసుపై లక్షరహిత ఆరోపణలు చేస్తోందని ప్రధాని డాక్టర్ మన్మోహన్ సింగ్ విమర్శించారు. దేశంలోని రైతు సమస్యల వంటి వాటిని వదిలేసి అర్థరహితమైన ఆరోపణలకు బిజెపి దిగుతోందని ఆయన అన్నారు. ఎన్నికల ప్రచార ర్యాలీలో ఆయన శనివారం ప్రసంగించారు. తమ ప్రభుత్వం రుణాల మాఫీ చేసిందని, వడ్లు, గోధుమల ధరలు పెంచిందని, ఎరువుల ధరలు తగ్గించిందని ఆయన చెప్పారు.

బిజెపికి, దాని భాగస్వామ్య పార్టీలకు విమర్శించడానికి విషయాలే లేకుండా పోయాయని, అవి రోజుకో విషయం కోసం అన్వేషిస్తున్నాయని ఆయన అన్నారు. ప్రతిపక్షాలు తప్పుడు ఆరోపణలు చేస్తున్నాయని ఆయన విమర్శించారు. రైతులకు సంబంధించి బిజెపి-అకాలీదళ్ సంకీర్ణ ప్రభుత్వం తప్పుడు ప్రచారం సాగిస్తోందని ఆయన అన్నారు. బిజెపి, అకాలీదళ్ లు అబద్ధాలు ప్రచారం చేస్తున్నాయని, వాటిని రైతులు క్షమించబోరని ఆయన అన్నారు.