రొటేషన్ సీఎం పెడదాం

హైదరాబాద్: ముఖ్యమంత్రి, మంత్రి పదవులను టీడీపీ, పీఆర్పీలు రొటేషన్‌ పద్ధతిలో తీసుకుంటే తప్పు లేదంటూ సీపీఐ రాష్ట్ర కార్యదర్శి కె.నారాయణ అన్నారు. అయితే అది ప్రజారాజ్యం పార్టీకి తగినన్ని సీట్లు వస్తేనే అనే కాషన్ పెట్టారు. అంతేకాక ఈ విషయంలో తెలుగుదేశం అధినేత చంద్రబాబుతో మధ్యవర్తిత్వం జరపడానికి తనకు అభ్యంతరం లేదని శెలవిచ్చారు. చివరలో మాత్రం రాష్ట్రంలో మహాకూటమికే ప్రభుత్వాన్ని ఏర్పాటుచేసే మెజారిటీ వస్తుందని అభిప్రాయపడ్డారు. టీడీపీ సొంతంగా 140 నుంచి 150 సీట్ల వరకు గెలుచుకుంటుందన్నారు.

దానికి మీడియా వారు పీఆర్పీకి తగినన్ని సీట్లు అంటున్నారు అంటే మీ ఉద్దేశంలో ఎన్ని సీట్లని అడగ్గా..70 నుంచి 80 సీట్లని చెప్పారు. అలాకాకుండా 20 నుంచి 30 సీట్లయితే..రొటేషన్‌ పద్ధతికి తెలుగుదేశం ఎలా ఒప్పుకొంటుందని ఎదురు ప్రశ్నించారు.పీఆర్పీ వారు కాంగ్రెస్‌, బీజేపీలకు వ్యతిరేకమంటున్నారు కాబట్టి పీఆర్పీని మహా కూటమిలో కలుపుకొంటే తప్పులేదన్నారు. మ్యాజిక్‌ ఫిగర్‌ తమదేనన్న చిరంజీవి మాటలపై స్పందిస్తూ..అది మే 16 తర్వాత తెలుస్తుందని నారాయణ ఉద్ఘాటించారు. టీఆర్‌ఎస్‌ కేంద్రంలో ఏ కూటమితో ఉన్నా..రాష్ట్రంలో మహా కూటమితోనే ఉండటమనే ప్రతిపాదన సరైంది కాదన్నారు.