అంబానీ మర్డర్ ప్లాన్ మిస్టరీ

ముంబయి: అనిల్‌ అంబానీ హెలికాప్టర్‌ కేసు మిస్టరీ వీడింది. ఇద్దరు ఎయిర్‌వర్క్స్‌ హెల్పర్లను ముంబాయి పోలీసులు సోమవారం అరెస్ట్‌ చేశారు. ఉదయ్‌ మనోహర్‌ వారికర్‌, బాలరాజ్‌ తేవార్‌ అనే ఉద్యోగులను అరెస్ట్‌ చేసి కోర్టుముందు ప్రవేశపెట్టగా, కోర్టు వీరికి 15వ తేదీ వరకూ రిమాండ్‌ విధించింది. వీరిద్దరూ సదరు హెలికాప్టర్‌ నిర్వహణ పనులను చూస్తున్న ఎయిర్‌ వర్క్స్‌ సంస్థలో హెల్పర్లుగా పనిచేస్తున్నారని నగర జాయింట్‌ పోలీస్‌ కమిషనర్‌ రాకేశ్‌ మారియా చెప్పారు.

'ఏప్రిల్‌ 22న హెలికాప్టర్‌ను క్లీనింగ్‌ కోసం పంపించారు...అప్పటికే తమ యూనియన్‌కు, యాజమాన్యానికి విభేదాలు ఉన్న నేపథ్యంలో వారికర్‌ ఈ అవకాశాన్ని ఉపయోగించుకోవాలనున్నాడు. వెంటనే ఇంధన టాంకులో గులకరాళ్లు, మట్టిపోశాడు" అని జాయింట్‌ కమిషనర్‌ ఆఫ్‌ పోలీస్‌ రాకేష్‌ మారియా తెలిపారు. కార్మిక సంఘం, యాజమాన్యానికి మధ్య విభేదాల కారణంగా గత ఏడాది ఆగస్టు నుంచి ఇలాంటి ఘటనలు ఐదు చోటుచేసుకున్నాయని చెప్పారు. కాగా, ఈ ఘటనలో ఎయిర్‌వర్స్క్‌ ఉద్యోగుల యూనియన్‌ పాత్రపై పోలీసులు అనుమానం వ్యక్తం చేస్తున్నారు.