బాబూ రహస్యమెందుకు: రోశయ్య

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు విదేశీ పర్యటనలపై గోప్యత ఎందుకు పాటిస్తున్నారని రాష్ట్ర ఆర్థిక మంత్రి కె. రోశయ్య ప్రశ్నించారు. చంద్రబాబు అందరికీ తెలిసిన రాజకీయవేత్త అని, అటువంటి రాజకీయ నాయకుడి పర్యటనలపై రహస్యాలు ఎందుకని ఆయన అన్నారు. సచివాలయంలోని డి-బ్లాక్ లో జరిగిన అగ్ని ప్రమాదంపై ప్రతిపక్షాలు చేస్తున్న విమర్శలపై ఆయన శనివారం మీడియా ప్రతినిధుల సమావేశంలో తీవ్రంగా మండిపడ్డారు.

భవంతి నిర్మాణం నాసిరకంగా జరిగిందని పత్రికల్లో వార్తలు వచ్చాయని, ఆ భవనం నిర్మాణంలో తమ ప్రమేయం లేదని, చంద్రబాబు ప్రభుత్వ హయాంలోనే దాని నిర్మాణం జరిగిందని, కాంట్రాక్టు చంద్రబాబు ప్రభుత్వ హయాంలోనే ఇచ్చారని ఆయన అన్నారు. అగ్నిప్రమాదంపై ప్రతిపక్షాలు విషప్రచారానికి దిగుతున్నాయని ఆయన విమర్శించారు. ప్రమాదంపై వేసిన ప్రభుత్వ కమిటీలో ప్రతిపక్షాలకు చోటు కల్పించాలని తెలుగుదేశం పార్టీ డిమాండ్ చేయడం విడ్డూరమని ఆయన అన్నారు.