తండ్రి అడుగుజాడల్లో నడుస్తా: వరుణ్

లండన్: తన తండ్రి సంజయ్ గాంధీ ప్రవేశపెట్టిన వివాదాస్పద గర్భనిరోధక శస్త్ర చికిత్స కార్యక్రమాన్ని పునరుద్ధరించాలని బిజెపి ఫిలిభిత్ లోకసభ అభ్యర్థి వరుణ్ గాంధీ అన్నారు. భారతీయులందరికీ సైనిక సర్వీసులను అనివార్యం చేయాలని ఆయన అభిప్రాయపడ్డారు. తన తండ్రి అడుగుజాడల్లో పయనించి భారత దేశానికి బలమైన నాయకత్వాన్ని అందించాలనేది తన ఉద్దేశమని ఆయన ఒక వార్తాపత్రికకు ఇచ్చిన ఇంటర్వ్యూలో చెప్పారు. గత 20 ఏళ్లుగా భారతదేశానికి బలమైన నాయకత్వం లేదని ఆయన అన్నారు.

అధికారంలోకి రావడం ఉద్దేశం కాదని ఎవరైనా చెప్తే అది అబద్ధమని ఆయన అన్నారు. సైనిక సర్వీసులను అనివార్యం చేస్తే కులమతాలకు అతీతంగా అందరూ ఏకమవుతారని ఆయన అన్నారు. తాము తమిళులమనో, బ్రాహ్మణులమనో ఆలోచించడానికి బదులు తాము భారతీయులమని ఆలోచిస్తారని ఆయన అన్నారు. ముస్లింలను తాను బెదిరించినట్లు వచ్చిన వార్తల్లో నిజం లేదని ఆయన అన్నారు.