చిరుసాయం కోసం అశ్వనీదత్

హైదరాబాద్: తెలుగుదేం నాయకుడు,సినీనిర్మాత అశ్వనీదత్‌ శనివారం సాయంత్రం ప్రజారాజ్యం అధ్యక్షుడు చిరంజీవిని ఆయన నివాసంలో కలిశారు. ఎన్నికల ఫలితాల వచ్చాక ప్రభుత్వ ఏర్పాటులో పరస్పర సహకారం కోసమే ఈ సమావేశం ఏర్పాటు అయిందని సమాచారం. ఇక తమ రెండు పార్టీలూ కలిసి పనిచేయాలని అశ్వనీదత్ ..చిరంజీవితో ప్రతిపాదించినట్లు సమాచారం. అలాగే ప్రజా రాజ్యం పార్టీ కు అధిక సంఖ్యలో సీట్లు వస్తే తెదేపా సహకరిస్తుందని, తెలుగుదేశానికి ఎక్కువ స్థానాలొస్తే ప్రరాపా మద్దతివ్వాలన్నది ఆ ప్రతిపాదన సారాంశమని తెలుస్తోంది. అయితే ఈ ప్రతిపాదనకు చిరంజీవి ఓకే అనిగానీ,కాదని కాని సమాధానమివ్వలేదని, ఫలితాలొచ్చాక మాట్లాడుకుందామని అన్నట్లు తెలిసింది. అయితే తెదేపా సూచన మేరకే చిరంజీవిని కలిశారో, ఆయనే స్వయంగా చొరవ చూపారో తెలియలేదు. వీరి సమావేశాన్ని తెదేపా వర్గాలు ధ్రువీకరించడం లేదు.

ఇక సినిమా రంగంలో చిరంజీవి, అల్లు అరవింద్‌లకు అత్యంత సన్నిహితుడైన అశ్వనీదత్‌ మొదటి నుంచీ తెలుగుదేశంలో ఉన్న సంగతి తెలిసిందే. అలాగే 2004 ఎన్నికల్లో విజయవాడ నుంచి లోక్‌సభకు పోటీ చేశారు..అప్పుడు ఆయన గెలుపుకి ప్రచారం కోసం చిరంజీవి అక్కడికి వెళ్లారు. ఇక మహాకూటమిలో కీలక భాగస్వామి అయిన తెరాస కేంద్రంలో ఎన్డీఏకి మద్దతివ్వాలని నిర్ణయించుకున్న కొద్దిగంటల వ్యవధిలోనే తాజా పరిణామం చోటుచేసుకోవటం విశేషం. అలాగే ఎవరితో కలిస్తే కేంద్రంలో, రాష్ట్రంలో పార్టీకి ఎక్కువ ప్రయోజనముంటుందో బేరీజు వేసి ప్రరాపా తుదినిర్ణయం తీసుకుంటుందని చిరంజీవికి అత్యంత సన్నిహితుడైన ఓ నాయకుడు తెలపటం విశేషం.