ఓడితే జయప్రద ఆత్మహత్య: అమర్

లక్నో: ఎన్నికల్లో ఓడిపోతే తమ పార్టీ రాంపూర్ లోకసభ అభ్యర్థి, సినీ నటి జయప్రద ఆత్మహత్య చేసుకునే ప్రమాదం ఉందని సమాజ్ వాదీ పార్టీ ప్రధాన కార్యదర్శి అమర్ సింగ్ అన్నారు. రాంపూర్ లో జయప్రద విజయానికి ఆయన కాలికి బలపం కట్టుకుని తిరుగుతున్నారు. అయితే, పార్టీ మరో ప్రధాన కార్యదర్శి, స్థానిక నాయకుడు ఆజం ఖాన్ జయప్రదను ఓడించాలని అదే స్థాయిలో ప్రచారం సాగిస్తున్నారు. అమర్ సింగ్ కు, ఆజం ఖాన్ కు మధ్య పార్టీలో తలెత్తిన వివాదం కారణంగా జయప్రద విజయావకాశాలు దెబ్బ తిన్నాయి. ఈ నెల 13వ తేదీన రాంపూర్ నియోజకవర్గానికి పోలింగ్ జరుగుతోంది.

జయప్రద 2004 ఎన్నికల్లో రాంపూర్ నుంచి లోకసభకు ఎన్నికయ్యారు. అప్పుడు ఆమె విజయానికి ఆజం ఖాన్ సహకరించారు. సమాజ్ వాదీ పార్టీ అధ్యక్షుడు ములాయం సింగ్ కూడా ఆజం ఖాన్ తీరుపై మండిపడ్డారు. ఆజంఖాన్ పార్టీని మోసం చేశారని ఆయన వ్యాఖ్యానించారు. ఈ స్థితిలో జయప్రద రాంపూర్ నియోజకవర్గంలో గట్టెక్కడం కష్టంగానే ఉంది.